កូរ៉េខាងជើងថ្លែងថាខ្លួនមានសិទ្ធិបា.ញ់បង្ហោះផ្កាយរណបស៊ើបការណ៍

ទីក្រុងព្យុងយ៉ាង៖ ប្រមុខដឹកនាំកូរ៉េខាងជើង លោកគីមជុងអ៊ុន ថ្លែងថាការបាញ់បង្ហោះផ្កាយរណបស៊ើបការណ៍កាលពីពេលថ្មីៗនេះជាការប្រើប្រាស់សិទ្ធិដើម្បីការពារខ្លួន។ លោកថ្លែងដូច្នេះបន្ទាប់ពីទីក្រុងព្យុងយ៉ាងអបអរសាទរព្រឹត្តិការណ៍បាញ់បង្ហោះនេះយ៉ាងកងរំពងដោយចាត់ទុកថាតែប៉ុណ្ណេះខ្លួនអាចវាយប្រហារទៅគ្រប់ទីកន្លែងនៃពិភពលោក។

កាលពីយប់ថ្ងៃអង្គារ កូរ៉េខាងជើងថ្លែងថាខ្លួនបាននាំយកផ្កាយរណបស៊ើបការណ៍ដំបូងគេទៅក្នុងទីអវកាស។ ប្រទេសខ្លះគ្រាន់តែទទួលដំណឹងនេះភ្លាម ក៏ប្រកាសថ្កោលទោសនិងចាត់ទុកថានេះជាការរំលោភទៅលើសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិដែលហាមប្រើប្រាស់បច្ចេកវិទ្យាជាប្រយោជន៍ដល់ការអភិវឌ្ឍកម្មវិធីមីស៊ីលផ្លោង។

លោកគីមទៅទស្សនាវិទ្យាស្ថានជាតិស្រាវជ្រាវបច្ចេកវិទ្យាអវកាស និងអបអរសាទរចំពោះក្រុមអ្នកវិទ្យាសាស្ត្រ និងអ្នកបច្ចេកទេសដែលសម្រេចបានសមិទ្ធផលនេះ។ លោកថ្លែងថាការបាញ់បង្ហោះផ្កាយរណបកាលពីយប់ថ្ងៃអង្គារជាព្រឹត្តិការណ៍ដ៏គួរឱ្យភ្ញាក់ផ្អើលនៅចំពោះមុខនៃទង្វើដ៏គ្រោះថ្នាក់ និងដ៏គឃ្លើននៃក្រុមបច្ចាមិត្តរបស់យើង។

លោកថ្លែងថាកូរ៉េខាងជើងមានសិទ្ធិបាញ់បង្ហោះផ្កាយរណបស៊ើបការណ៍។ កងទ័ពកូរ៉េខាងជើងមិនអាចដកថយ ឬបញ្ឈប់បេសកកម្មការពារខ្លួនបានឡើយសូម្បីនៅក្នុងពេលបច្ចុប្បន្ននេះក៏ដោយ។ តាមរយៈរូបថតជាច្រើនសន្លឹក គេឃើញថាក្រុមគ្រួសាររបស់លោកគីមក៏បានចូលរួមនៅក្នុងពិធីអបអរសាទរនោះផងដែរ។

នៅក្នុងពិធីលៀងសាយភោជន៍នោះ គេឃើញកូនស្រីរបស់លោក ប្រពន្ធ ប្អូនស្រី អ្នកវិទ្យាសាស្ត្រ និងអ្នកបច្ចេកទេសអង្គុយជុំគ្នានៅទីនោះ។ គួរកត់សម្គាល់ថាការបាញ់បង្ហោះផ្កាយរណបស៊ើបការណ៍គិតទាំងលើកនេះទៀតជាលើកទី៣ហើយ។ បាញ់២លើកដំបូងទទួលបរាជ័យ។ ការបាញ់លើកទី៣នេះបន្ទាប់ពីលោកគីមទៅជួបលោកពូទីននៅទីក្រុងវ៉្លាឌីវ៉ូស្តុក។

កាលនោះ ប្រទេសរុស្ស៊ីសន្យាថានឹងជួយជ្រោមជ្រែងកូរ៉េខាងជើងនៅក្នុងការបាញ់បង្ហោះផ្កាយរណប។ ក្រុមស៊ើបការណ៍កូរ៉េខាងត្បូងយល់ថាផ្កាយរណបទី៣នេះប្រហែលជាទទួលបានជោគជ័យ។ គ្រាន់តែថាពួកគេមិនទាន់ប្រមូលបានភស្តុតាងគ្រប់គ្រាន់ដើម្បីបញ្ជាក់ឱ្យបានច្បាស់អំពីរឿងនេះ។ កូរ៉េខាងត្បូងយល់ថារុស្ស៊ីប្រហែលជាបានជួយផ្នែកបច្ចេកទេស។

គេដឹងថាកូរ៉េខាងជើងបានផ្ដល់គ្រាប់កាំភ្លើងធំរាប់លានគ្រាប់ទៅឱ្យប្រទេសរុស្ស៊ី។ ប្រទេសទាំង២បញ្ជាក់ថាខ្លួនគ្មានកិច្ចព្រមព្រៀងសម្ងាត់ផ្នែកយោធាជាមួយគ្នាទេ។ ប៉ុន្តែខ្លួននឹងពង្រឹងកិច្ចសហការកាន់តែស៊ីជម្រៅជាមួយគ្នា។ ក្រុមស៊ើបការណ៍កូរ៉េខាងត្បូងជឿជាក់ថាផ្កាយរណបនោះបានដាក់នៅក្នុងគន្លងត្រឹមត្រូវហើយ។ ប៉ុន្តែគេត្រូវការពេលវេលាដើម្បីតាមដានជាបន្តទៀតមុននឹងវាយតម្លៃថាផ្កាយរណបអាចដំណើរការជាប្រក្រតី៕